يبدو إن أحمد حلمى خد طريق جديد على السينما المصرية وناوى يمشى فيه علطول ويتفرد بيه , فبعد تجربة " آسف على الإزعاج " المقتبسة عن فيلم راسل كرو " العقل الجميل " الحائز على جائزة أوسكار أحسن فيلم لعام 2002 وطبعا أحسن ممثل , أعاد حلمى نفس التجربة مع فيلم ألف مبروك والمقتبس أيضا عن فيلم " عيد جراوند هوج " للممثل بيل موراى , وفى كلا المناسبتين أحمد حلمى اضاف الشخصية والطبيعة المصرية على الفيلم مع أداؤة التمثيلى الرائع مما يجعلنا نقول لأحمد حلمى وبكل ثقة , ألف مبروك يا حلمى على تفردك بالمرتبة الأولى للممثلين العرب جميعاً .وبما إنى من المحظوظين اللى شافو فيلم " 1000 مبروك " أول لما نزل فى أول عرض إسمحولى محرقش الأحداث ولا أقول أى تفاصيل لأن فيلم زى ده لازم يتشاف فى السينما وبدون أى تلميحات , لكن عندى كذا نقطة عاوز أتكلم فيها بخصوص الفيلم .
ألف مبروك تجربة سينمائية يقوم فيها حلمى بالبطولة المطلقة , وحتى الأدوار الأساسية فى الفيلم كلهم يا إما ممثلين جدد أو ممثلين غير معرف أسمائهم زى الممثل اللى رقم خمسة بيضحكه , فدى رسالة لكل منتجى الأفلام مفاداها إنه مش لازم تجمع كل نجوم التمثيل فى عمل واحد علشان ينجح , والدليل فيلم زى ليلة البيبى دول اللى فشل بكل المقاييس ونقيضه فيلم ألف مبروك اللى بتوقعله نجاح ساحق بنسبة 100 %
ومن توقعاتى أيضاً إن كل اللى يشوف الفيلم ده ويخرج من السينما هيطلع يحلف إن ده كان أجمل فيلم شافه فى حياته , وطبعا لازم يكون فيلم العام 2009 .
كان ممكن على تقييمى الشخصى أدى الفيلم 10 من 10 فى كل حاجة , لكن المؤلفين المصريين مازالوا غاويين إستسهال ويقتبسوا مع أعمال أمريكية ويبوظوا علينا الليلة ! , ولو كانت فكرة الفيلم مصرية كان فعلا هيبقى أحسن فيلم فى التاريخ المصرى !!
أحمد حلمى تمثيل رائع كالعادة , وأخيرا طالع فى شخصية شاب إبن ناس جدا ومليان عيوب , غير ما يكون هو الشخصية البريئة الطاهرة اللى بتفضل على طبيعتها الأصيلة لحد ما يبقى غنى زى ما عمل فى أفلام مطب صناعى وجعلتنى مجرما , مزيج بين العقل والهبل , والإستظراف والحزن , بالإضافة إلى الإخراج اللى نجح فى إخراج الفيلم بهذا الشكل المبهر , لولا غلطة الويب كام اللى بينت أد ايه المخرج ده جاهل بالتكنولوجيا !!!
رسالة الفيلم بتيجى عن طريق صدمة , بمعنى أنك ممكن تخرج من الفيلم وتغير إسلوب حياتك الشخصية بالكامل , ومضمون الرسالة إنك تعيش غائب حاضر أحسن مليون مرة من إنك تعيش حاضر غائب , وبلاش تفاصيل إضافية علشان محرقش الفيلم !!
لو عاوز تدخل فيلم إنت وأسرتك وتخرج انت وهما كلكم مبسوطين والمود متغير , أنصحك ب " ألف مبروك "
برافو أحمد حلمى على الفيلم الرائع وعلى صدارتة لقائمة أحسن ممثلين العرب .. وألف مبروك !
Posts
1 comments:
ana kaman da5alt el film ya eslam , w 3agabny geddan , ma3a enni ma7abtesh el nehayya , enta 3aref el sha3b el masry ye7ib el happy endings :D
Post a Comment