جيل الثمانينات - جيلى - خرج إلى الحياة ليجد أمامه إختيار واحد لا ثانى له , التليفزيون المصرى بقناتيه الأولى والثانيه وكل سنه وهو طيب على كده ..
كان منطقى وطبيعى إنه يتلقى كل الميديا المتاحه قدامه بمحاسنها القليلة ومساوئها الكثيرة !
بعدها بفترة ظهرت تكنولوجيا جديدة وثورة فى مجال علوم الإتصالات وبقى فيه دش ومحمول وإنترنت
فجأة لقى إن كل اللى تلقاه من التليفزيون المصرى - إعذرونى على إستخدام كلمة تليفزيون لهذا الشىء - مجرد تضليل وكلام فارغ ويؤدى إلى التخلف فى إتجاه وان واى !
جيلى فقد الثقه فى كل اللى شافه وتلقاه طول عمره , واللى زاد الحالة دى لما تخرجنا من الكليات لنصطدم بواقع جديد بيقول إن كل اللى إتعلمناه فى حياتنا لا علاقة له بإحتياجات سوق العمل.
وكإن العملية ناقصة !
أمثلة النجاح كانت قليلة جدا ووجود مثال لنتخذة قدوة فى حياتنا المعاصرة كان شبه معدوم.
فلو لقينا حد ناجح نكتشف فى النهاية إنه مزور وحرامى ومرتشى
ولو لقينا حد متدين وعارف ربنا صح .. نكتشف فى النهاية فضائحه الأخلاقية.
يا ربى !
طيب نلاقى منين قدوة؟
مغنى؟ وللا ممثل وللا لاعيب كورة؟
فجأه ظهر محمد أبو تريكة لاعب الأهلى والمنتخب المصرى.
لاعب كرة موهوب وإنسان متواضع وأخلاقة عالية ومتدين.
والحق يقال أن الراجل فعلا محترم وبيفرح المصريين كلهم ومخلص فى عمله علشان كده ربنا بيوفقه
لكن مش ملاك ! ومن حقه يغلط لآخر يوم فى عمره واللى مش متعرف بالحقيقة دى يبقى غلطان ..
أبو تريكة يستحق إنه يكون قدوة لشباب هذا الجيل والجيل اللذى يليه
وعلى كل هواة تشويه كل شىء جميل فى حياتنا انهم يقتنعوا بحقيقة الراجل اللى مش ملاك
ويخلونا نستمتع بقدوة صح !
فهل يتحقق ذلك؟
أتمنى ..
Posts
0 comments:
Post a Comment