!عملت إيه السنة اللى فاتت؟؟

لازم أعمل حاجه الليلادى قبل ما نام !!

ده اللى كنت بقوله لنفسى قبل ما أكتب اى حاجه .. وطبيعى الحاجه اللى هعملها دى مش إعادة اكتشاف الذرة !! .. أكيد طبعا هتكون مقال جديد أضيفة للمقالات بتاعتى اللى تحت عنوان " لم تنشر بعد "

بعيدا عن المقدمات الطويلة واللغة العربية الفصحى ( اللى ليها ناسها الصح ) انا كنت ناوى اكتب الموضوع ده قبل ما السنه الجديدة تبدأ .. بس يمكن مالقيتش وقت او كسلت او حتى كنسلت الحوار أو .. أو .. المهم انى مكتبتش حاجه الا الوقتى حالا !

آسف نسيت اقول موضوع ايه اللى كنت هكتب عنه .. الاجابه ببساطة هى رأس الموضوع ده " عملت ايه السنه اللى فاتت "

أيوة السؤال موجه ليك انت يا قارىء الموضوع .. عملت ايه السنه اللى فاتت؟
حد يرد عليا ويقول " إنت مالك " , حد تانى يقولى " انا مفهمتش تقصد ايه " , حبايبى .. كل اللى اقصده ان السنة الجديدة بدأت والسنه القديمة انتهت .. يا ترى عملت فيها حاجه؟

من المعروف ان العالم كله بيحتفل بالكريسماس بكل مظاهرة من شجر الكريسماس والألوان وبابا نويل وأشكال الثلج الغريبه دى إلى آخره من مظاهر الاحتفال .. واحنا طبعا كمصريين وعرب بنقلدهم بالظبط وبنحتفل معاهم !

أنا عن نفسى بحتفل .. بس بطريقتى الخاصة .. وبما انى شاب مصرى عربى مسلم , فمش بحتفل بالكريسماس لأنه عيد مش عيدى ! .. ده عيد المسيحيين والأقباط حول العالم .. حتى الكل يلاحظ ان كلمة كريسماس مشتقة من كلمة كريستيان أو مسيحى .. أنا بتحتفل بإن العداد الجديد للسنه الجديدة بدأ في العد وأبدأ أحسب انا عملت ايه السنه اللى فاتت , وأخطط لنفسى أنا ناوى أعمل ايه السنه اللى جايه ..

فمن وأنا عندى 16 سنه متعود على العادة دى ومواظب عليها وأعتقد انها عادة جيدة

وبصراحه احنا مش محتاجين سنه جديدة علشان نعيد حسابتنا من السنه للسنه .. المفروض كل واحد فينا – وانا اولكم – قبل النوم كل يوم يسترجع يومه كان عامل ازاى ويسأل نفسة ..
أنا غلطت في حق مين ولازم أراضية؟
أنا عصيت ربنا كام مرة النهاردة؟
إتعلمت كام حاجة جديدة النهاردة
خدت ثواب في كام حاجه صح عملتها النهاردة؟

لكن قليل قوى مننا اللى بيعمل كده .. والحجة الأبدية " مشغول "

طيب انا هتكلم عن نفسى شوية في 2007 .. حد عنده مانع؟

معلش هشرككم معايا شوية في اللى عملته العام الفائت .. يمكن تشوفوا انا بحسب العام بتاعى على اساس ايه وتلاقوها فكرة حلوة تقوموا تقلدونى ..

في إعتقادى الشخصى أن عام 2007 كان أفضل وأنجح الأعوام اللى مرت عليا في حياتى !!

لأسباب عديدة العملية منها والشخصية
فلو تكلمت عن الأسباب العملية أستطيع أن أقول أن عامى الفائت شهد تطورا ملحوظا في آدائى المهنى .. على المستوى الوظيفى " الوظيفة بتاعتى " أو على مستوى إنتاجى الشخصى ..

فالشغل معروف .. انا شغال في شركة ايه وبعمل ايه .. انا بتكلم عن كل حاجه انا بذلت فيها مجهود دون مقابل مادى

زى مثلا .. برنامج " تحت الضوء " اللى نفذته مع زملائى في العمل .. كان فكرتى وكنت انا اللى بقدمه وبختار الشخصيات اللى بعمل معاها اللقاء وبختار الأسئلة وبعمل المونتاج للبرنامج

أو البلوج بتاعى – اللى نفسى أحن على نفسى وأفتحه بقى – وتطوير نفسى عن طريق الكتابة باللغتين العربية والإنجليزية

كمان العام ده شهد تطور ملحوظ في طريقة تفكيرى نحو مستقبلى أو ما أريد أن أكون بعد كده

يعنى بما انى مش هشتغل بشهادتى – اللى لسه مخدتهاش – وده شىء منطقى انى مشتغلش بيها والدليل على كده انى حاليا مش شغال بيها , وبرضة مش معايا المؤهلات اللى عند المحيطين بيا في العمل وخلافة – البرمجه مثلا – يبقى اشوف انا متفوق في ايه وبعمله باستمرار كهواية وأبدأ اعمل بإحترافية .. وقد كان , وكان الشىء ده هو الكتابة أو العمل الصحفى أو الأدبى أو كل ما يتعلق بالكتابة إعتمادا على الدماغ وليس النقل بكل أنواعة

فبالرغم من إنى بكتب من حوالى 9 سنين , الا ان جميع كتاباتى – ماعدا استثناءات بسيطة – مازالت حبيسة درج مكتبى .. ليه؟ الله أعلم

يمكن كانت غالبية كتاباتى كانت شبه يوميات أو حاجه تتعلق بيا انا فقط؟ .. او انى كنت اتحرج انى اعرض اى حاجه انا كاتبها على اى شخص؟ .. ربما

لكن وبإذن الله عام 2008 سيشهد دخولى عالم الكتابة من أوسع أبوابة عن طريق الإختراع العبقرى " البلوج " , فبما ان غالبية حياتى عالنت .. يبقى الطبيعى ان كل كتاباتى تبقى في بلوج مش مجلة مثلا ..

نعود لعام 2007 تانى .. لو على المستوى الشخصى أظن انى متغيرتش كتير عن الاعوام اللى قبل كده بس حاسس انى بقيت صبور اكتر .. وأتعتقد ده طبيعى بفعل السن ليس الا

الحب في حياتى عام 2007 .. ممكن اقول ان يوم الفالنتين اللى فات – أول مرة احتفل بيه في حياتى كلها – كان مثالى .. لكنه كان يوم وبس .. وده اللى اتذكره عن الحب في 2007 .. يعنى لسه عايش وحيد برضه !

حاجات كتير عملتها السنه اللى فاتت معملتهاش قبل كده في حياتى وكان نفسى اعملها من زمان زى الأجازة السنوية مثلا , قضيت أسبوع ولا أجمل مع واحد من أقرب أصدقائى وفى أكثر مكان مقرب إلى قلبى .. الإسكندرية

وطبعا كان فيه غلط كتير .. وغلط فادح كمان , والله حليم ستار . مش معقول يبقى ربنا سترها معايا واقوم جاى فاضح نفسى قدامكم كده علنى !!

غير كده برضه رجعت علاقاتى مع ناس كتير كان علاقتى بيهم شبه انقطعت .. والحمد لله انا سعيد ان الميه رجعت لمجاريها

لاحظوا انى مذكرتش حاجه عن المستوى الدراسى .. لانه باختصار مش دراسى خالص !!
واحد دخل اكاديمية او معهد علشان ياخد منه شهادة والسلام .. مش بيحضر اى حاجه الا العملى – ابو درجات – بالعافية وبييجى قبل الامتحان بيوم بيشترى مذكره يبلها ويشرب ميتها ويقوم داخل ممتحن وفى النهاية بينجح !!

وعلى المستوى البدنى .. الحمد لله بعد ما كنت وصلت "لأتخن وضع وصلتله في حياتى " نجحت انى اتخلص من بعض الوزن الزائد ده بقليل من المجهود وكثير من العزيمة

لكن اسوء شىء في 2007 وفى حياتى كلها انى حسيت في وقت من الاوقات انى معدتش بحس بالسعادة ومازال الاحساس ده مراودنى حتى الان ..

هل ده الطبيعى انى لما اوصل للمرحلة السنيه دى اكون خلاص – بحكم الروتينيه – فقدت كل احساس بالسعادة؟
هل عشان وحيد أو حاسس بوحدة؟
هل عشان مفيش حب في حياتى؟
هل عشان النهاردة زى بكرة زى امبارح زى من سنه؟

مازلت لا املك اجابة مقنعة على الاقل بالنسبة لى .. لكن التحدى الاكبر ليا في 2008 هو انى اعرف اجابة السؤال ده واحاول اتجنب سببه من الاساس .

أعتقد انكم بكده عرفتوا انا بحسب السنه بتاعتى على اساس ايه .. يا ترى عجبتك الطريقة وهتقلدها؟ .. حتى لو معجبتكش ومش ناوى تحسب حاجه المهم .. ميضيعش من عمرك سنه على الفاضى من غير ما تطلع منها كسبان !

لحد كده وكفاية .. طولت عليكم النهاردة .. أشوفكم ان شاء الله في المقال القادم ليا

الابالحق .. هو لو اللى كتبته ده مسموش مقال يبقى اسمه ايه؟؟

إسلام يونس.

شاهد الحلقة الأولى من برنامج تحت الضوء