! وآدى اللى باقى منها .. صورة ولكن مهزوزة

أنا مش مصدوم فيها منا خدت على الصدمات
كل الحكاية إنه عزّ عليا البعاد
إديتها سنين من عمرى
شفتها بتكبر قصاد عينى ..
ومصدقتش إنى سيبتها إلا لما سمعت صوت القطر ..

وآدى اللى باقى منها .. صورة ولكن مهزوزة !
وذكريات فى دماغى بتعدى زى فيلم عربى قديم
وإبتسامتين ..
شموع إنقادت وإنطفت
خطوات على طريق وإختفت

مكانتش عايزة تعيش صح .. كانت عايزة تعيش وخلاص
كسرت قلوب بإيديها ومستغربة من بُعد الناس
فقدت النطق .. وإستغربت
لكن إفتكرت ..
إن كل ماكان القرب بزيادة زادت بُعد وبزيادة !

بصيت حواليا ولقيت كتير عايشين
الحياة عادية , طبيعية والناس ماشيين
وإنتى ليه بقيتى كده؟
عمرى ما كنت كاره ولا هكون
وعمر ما بعدك عنى هيبقى ضياع الكون
وأنا مش مجنون !

مصيرك هتتعلمى درسك بنفسك محدش هيعلمهولك
وكفاية عليا درس الوداع
كان عندى أمل فيكى بس ضاع
وأنا مش بيّاع ..
هفضل فاكرك بكل خير
وأعرف أخبارك .. مع كل همسة طير
وأشوف وشك بخير !