مرايات الحيرانين

قوللى ياللى فى المراية , فهمنى إيه الحكاية؟
وأبص لروحى فجأه لقيتنى كبرت فجأه ..
مرايتى .. قوليلى يا مرايتى

أغانى المرايات كترت قوى .. حد متفق معايا على كده؟
بقى الوضع كده مع كتير من شباب مصر .. وفجأة ؟
محدش فاهم نفسه , محدش لاقى نفسه ولا عارف هو عايز إيه هو عايش ليه ..
طب تفتكروا ده بسبب إيه؟
حد من الحيرانين دول فكر ولو لمرة واحدة هو كده ليه؟
طيب .. حد فيهم فكر هو لسه عايش وربنا سايبه عايش لسه ليه؟
ماظنش ..

ربنا خلق كل شىء وجعل لكل شىء حكمة معينه , والمحظوظ بجد اللى بيلاقيها وبيحل معادلته فى الحياة وبالتالى بيكون سعيد.
أما اللى بيفشل فى حل معادلة نفسه , مهما بص فى المراية مش هيعرف نفسه ..
ولو معرفش نفسه مين هيعرفه؟

كل واحد فى الدنيا موجود فى مكان ما فى وضع ما لسبب معين , ربنا خلقنى وخلانى فى وضعى ده – سواء كان وضع جيد او سىء – وأكيد فيه سبب.
ربنا مخلقش البشر علشان يتعذبوا فى الأرض , لكن البشر هما اللى بيعذبوا نفسهم.

فكر ولو مرة إنت كده ليه .. وجودك فى الحياة ودلوقتى سببه وحكمته إيه
صدقنى لو دورت جواك هتلاقى الإجابة ..

قال الله تعالى : وَمَا خَلَقْتُ الْجِنَّ وَالْإِنْسَ إِلَّا لِيَعْبُدُونِ
نفذ أول سبب انت اتخلقت ليه فى حياتك , وساعتها التغيير هيبتدى ..
وهتعرف نفسك قبل غيرك , حتى لو كان جواك طلاسم.
بس إبدأ من دلوقتى .. وبطل بص فى المراية ..
وليك منى إهداء .. بطّل تحير نفسك

إسلام يونس

26\2\2009